Hollensk kona hefur skotið á skotskífur á útimörkuðum á hverju ári frá því hún var 16 ára árið 1936. Í hvert skipti sem hún hittir í mark tekur sjálfvirk myndavél ljósmynd af henni. Því eru til myndir af konunni á öllum æviskeiðum hennar í sömu stellingum.

Ria van Dijk stendur grafkyrr og einbeitt. Hún tekur í gikkinn og skýtur. Hún hittir þráðbeint í miðju skotskífunnar. Um leið tekur sjálfvirk myndavél ljósmynd af henni. Myndina tekur hún heim með sér, enda eru það verðlaunin fyrir að hitta í mark.

1936.

1938.

1951.

Ria van Dijk elskar skotfimi og fer að minnsta kosti einu sinni á ári á útimarkaðinn til að skjóta. Hún hitti fyrst í mark árið 1936, þegar hún var 16 ára stúlka í Tilburg, og eignaðist um leið fyrstu myndina af sér á skotpallinum. Hún er á tíræðisaldri í dag og fer enn að skjóta.

Vegna þessa áhugamáls hennar hefur hún óafvitandi safnað myndum af sér frá öllum æviskeiðum þar sem hún stendur í sömu stellingunni, ár eftir ár og miðar á skotmarkið. Eina undantekning er að engar myndir eru skiljanlega til frá heimsstyrjaldarárunum 1939 til 1945.

En að þeim árum frátöldum eru til myndir frá hverju ári. Myndirnar voru ekki bara teknar í heimabæ Riu, heldur einnig í nærliggjandi bæjum. Ria van Dijk er löngu orðin fræg í sínu heimahéraði fyrir einstaka skotfimi sína.

1954.

1962.

1973.

1975.

1980.

1982.

1993.

1998.

2003.

2009.

Ljósmyndararnir Erik Kessels og Joep Eljkens söfnuðu myndunum saman með leyfi Riu van Dijk og gáfu út í glæsilegri bók sem spannar 74 ár. Þeir segja að ljósmyndirnar segi á óvæntan hátt ævisögu manneskju frá óvenjulegu sjónarhorni. Þær leyfi okkur að skyggnast inn í ólík tímabil í lífi hennar í síbreytilegu umhverfi. Um leið beri þær vitni um þróun ljósmyndatækninnar. Bókin kom út í bókaflokknum In Almost Every Picture en Lemúrinn hefur áður fjallað um bók í þeim flokki sem fjallaði um svartan hund sem myndaðist illa.

Hér sjáum við nýlegar myndir af hinni skotfimu konu ásamt forleggjurum og velunnurum.