Þessi mynd er tekin í september 1936 og sýnir verkamenn í skipasmíðastöð Blohm & Voss í Hamburg, við sjósetningu seglskipsins SSS Horst Wessel. Viðstaddur sjósetninguna var kanslari Þýskalands, Adolf Hitler, og þegar hann steig fram gerðu verkamenn Blohm & Voss að sjálfsögðu það sem ætlast var til: hylltu Foringjann með Hitlerskveðju. Það er að segja — allir nema einn. Á meðan flestir verkamennirnir rétta út hægri hönd í átt að Hitler er einn maður, til hægri á myndinni, sem stendur með krosslagða arma, ákveðinn á svip.

Maðurinn á myndinni er August Landmesser, fæddur 1910. Það kann að útskýra augljósa andúð Landmessers á Hitler að unnusta hans og barnsmóðir, Irma Eckler, var Gyðingur, og yfirvöld höfðu nýlega bannað slík sambönd.

Gyðingaskírteini Irmu Eckler.

Ári eftir að þessi mynd var tekin var Landmesser fangelsaður, sakaður um „Rassenschande“ — kynþáttaspjöll. Irma var einnig tekin höndum. Tvær dætur þeirra — Ingrid, fædd 1935, og Irene, 1937 — voru sendar á munaðarlausrahæli.

Landmesser losnaði úr fangelsi 1941. Hann var síðan kallaður í herinn og snéri aldrei aftur heim af vígvellinum. Hann var úrskurðaður látinn 1949. Irma var send í hinar alræmdu kvennafangabúðir Ravensbrück og lést í gasklefunum 1942.

August Landmesser með unnustu sinni Irmu Eckler og dæturunum Ingrid og Irene, skömmu áður en að fjölskyldan tvístraðist.

Báðar dæturnar lifðu af stríðið og ömurlega dvöl á munaðarleysingjahælum. Eldri systirin Irene bar kennsl á föður sinn á myndinni hér að ofan, þegar hún birtist í dagblaðinu Die Zeit árið 1991.