Aksjónhetjan Sylvester Stallone hefur ýmsa fjöruna sopið og reynt fyrir sér á ýmsum sviðum; leikið, leikstýrt, málað málverk — og nú hefur hann líka hannað penna.
Pennann, sem ber hið grípandi nafn Chaos, hannaði Stallone í samstarfi við Montegrappa, einn elsta og virtasta skriffæraframleiðenda Ítalíu. Sótti leikarinn innblástur í endurreisnarlistamennina Battista Franco, Albrecht Dürer, Hans Sebald Beham og Antonio Pollaiolo. Penninn á að túlka skrifarnum hugmynd Stallones um ‘kaos’, og — nú er vitnað í hönnuðinn sjálfan — gefa honum „tilfinningu fyrir Endurreisninni, þegar allt var einfaldara og kannski göfugra, ólíkt hinu nútíma tæknisamfélagi okkar.“
Penninn er búinn til úr ekta sterlingssilfri og í mjög takmörkuðu magni: aðeins verða framleiddir 1000 blekpennar og 912 kúlupennar, en fyrirtækið Montegrappa var einmitt stofnað árið 1912. Hver penni mun kosta rúmar 450.000 íslenskar krónur.
![Penni](http://lemurinn.is/wp-content/uploads/Screen-Shot-2011-11-09-at-1.08.41--e1320797387610.png)
Stallone mundar pennann.
Sterlingssilfur nægir þó varla hinum sanna Stallone-aðdáenda. Einnig verða framleiddir 200 lúxus Chaos-pennar úr átján karata gulli. Ekki er tekið fram í fréttatilkynningu hvað þeir pennar muni kosta. Né heldur er verðmerking á lúxus-lúxus útgáfu pennans, sem verður ekki einungis úr átján karata gulli heldur líka skreytt eðalsteinum.
Enda þarf sá sem íhugar á annað borð að fjárfesta í Sylvester Stallone-penna úr skíragulli varla að spurja um verðið.
Áhugasömum er bent á stórkostlega heimasíðu Montegrappa, þar sem djúp hugmyndafræði aksjónhetjunnar á bak við pennahönnunina er skýrð frekar.